હતા સદા જે સંગાથે, તે સ્મરણમાં રહી ગયા,
વર્ષોના વહાણાં સહેજે, ક્ષણોમાં વહી ગયા,
ખૂબ વધ્યા ઓછાયા અને ફૂલી ફાલી એકલતા,
મારા નાનપણાના મિત્રો, હવે યાદો થઈ ગયા.
માટી ફેંદતા સાથે સાથે, રમતા સાથ લખોટી,
હું ખેંચતો ચડ્ડી કદીક, તું ખેંચે મારી ચોટી,
પાટી પેન ને ચમચમ સોટી, લંગોટી રહી ગયા,
મારા નાનપણાના મિત્રો, હવે યાદો થઈ ગયા.
ચોપાટીએ ઘર ઘર રમતા, ગાતાં ગીત મજાનાં
શાળાએથી ભાગી જાતા, કેવા છાના માના
ઝાડુ વેલણે બરડે દીધા, લીસોટા રહી ગયા
મારા નાનપણાના મિત્રો, હવે યાદો થઈ ગયા.
રાજુ ને હીતુ, રેખુ ને ભાનું,
શોરથી આવી, ભાગતા છાનુંમાનું
છાનામાના જીવનમાંથી, ક્યાં તમે સરી ગયા
મારા બાળપણાના મિત્રો, હવે યાદો થઈ ગયા.
સ્મરે છે હજી બાની આંગળી, પકડી લીધો મારગ,
જીવનભર સાચના રસ્તે થયા ન કદી ફારગ,
એ રસ્તે સાથે ચાલનારા, ક્યાંયે રહી ગયા,
મારા નાનપણાના મિત્રો, હવે યાદો થઈ ગયા
ટિપ્પણીઓ નથી:
ટિપ્પણી પોસ્ટ કરો